Mannen bak Jøsang Sjømat, Kurt Jøsang (43), fortel at oppussinga av lokalet i huset ved sida av Sjonar akkurat er ferdig. Sidan oppstarten av firmaet 1. mars i år har han også hatt utsal der, med stor respons, mest av lokale folk, men også forbireisande.

Mottaks– og produksjonshall har han på Jøsang på hobbybasis, kor underteikna var på besøk veka før 17. mai. To flotte hus med maritimt preg ligg ved ein stor kai, der det har gått med over 100 m3 betong.

Bygget er godkjent av Mattilsynet med godkjenningsnummer R 937. Det er også installert renseanlegg m/ UV-filter til ferskvatnet.

Det eine huset tilhøyrer fiskarbroren og fast bidragsytar, Sigurd. Idéen til Jøsang Sjømat fekk Kurt då brørne fekk tildelt sjøtomter på heimagarden.
- Det er faktisk rundt 15 år sidan me begynte å snakka om dette, så det har vore ein lang prosess med kommune og fylkeskommune til der eg er i dag, fortel Kurt, som kan tilby assorterte varer med fisk og skalldyr, med hovudvekt på skalldyr.

Tar i mot alt

Spesialiteten er fersk reke - naturleg sidan Sigurd er fiskar av det matnyttige krepsedyret. Broren sin bifangst av rekefisket er for det meste  torsk og breiflabb, og Kurt foredlar fisken i porsjonspakkar, som han har erfart er populært blant kundane. Den vesle råreka tar han også i mot. Dei blir nedfrysne og leverte på Husøy.

Kurt fiskar også sjølv på hobbybasis, torsk i februar/mars, sjøkreps på våren og utover sommeren før hummarfisket startar 1. oktober. Han har god hjelp av syskenbarnet, Arne Jøsang. Elles gjer han stort sett alt sjølv, i tillegg til å ha investert over to mill. kr. til nå. Han har også full jobb som losbåtførar i Kystverket, der han i skiftarbeidet har fire veker fri om gongen.

Stor interesse

Skipsføraren har m.a. hatt besøk frå Fiskesentralen i Oslo. Dei var veldig interesserte i fast leveranse på fisk og skalldyr. Han fortel også om førespørslar frå andre fiskebåtar om å levera fisk til Jøsang Sjømat. Varene er populære at han sel unna etter kvart. Det er mykje som tyder på at Kurt snart må tilsetta folk.

- Ja, dersom dette ekspanderer i rakettfart, må eg gjera noko, smiler han, som også har planar om å selja røykefisk.

Jøsang Sjømat har eiga Facebook-side og har stort sett blitt kjent der, og gjennom ”Jungeltelegrafen”. Kurt tar opp bestillingar på Facebook, eller på tlf. 93212888.

Rekene til Kurt blir kokte om bord i båten til Sigurd, ”Jarstein”. I mottaks– og produksjonshallen ligg rekene 5-6 min. i 15% saltlake før dei blir heiste opp for væskeavrenning i ein time. Så blir dei pakka saman med is i isoporkassar, 15 kg. i kvar kasse.

2. etasje

Arbeidsjernet har også innreidd overetasjen i huset ved sjøen.  Her finn ein både spise/opphaldsrom, kontor, kjøkken, bad og lagerrom.

I sommar blir det sal av fisk og reker, sjøkreps og kokt krabbe i Slåttevik. Sistnemnde vil bli såkalla garanterte.

Bokn Bygdablad ynskjer lukke til!