Av kommunalsjef helse og omsorg, Grethe Heimvik
Den viste at pleie- og omsorg i Bokn kommune kom på 23. plass innanfor denne sektoren i Kommunebarometeret for 2021. Det er totalt 356 kommunar med i rapporten, så at sektoren totalt sett hamnar på 23. plass er noko kommunen kan vere stolt av!
Kommunebarometeret vert utarbeidd kvart år av Kommunal Rapport, og er ei samanlikning av kommunar basert på 151 ulike nøkkeltal innan 12 ulike sektorar: Barnehage, barnevern, grunnskule, helse, kostnadsnivå, kultur, miljø og ressursar, pleie- og omsorg, saksbehandling, sosialteneste, vatn, avløp og renovasjon, og økonomi.
Fagutdanning
Sektoren utgjer 20% av den totale vekta i barometeret, og det er 19 nøkkeltal for sektoren. I Bokn har 97,5% av dei tilsette fagutdanning, og vi ligg difor blant dei beste i landet på dette området. Vi har over mange år satsa på etter- og vidareutdanning av personale i helse- og omsorgssektoren, og har ifølge Kommunebarometeret 2021 statistisk 34,48 årsverk med geriatrisk sjukepleiar pr 1 000 innbyggarar over 80 år.
Kommunen skårar og høgt på antal årsverk av psykiatriske sjukepleiarar pr 10 000 innbyggarar, og er ifølge Kommunebarometeret 2021 altså blant dei beste i klassen på dette nøkkeltalet.
I tillegg til at vi skårar høgt på årsverk av geriatrisk sjukepleiar pr 1 000 innbyggarar over 80 år, er vi og blant dei beste på andre område, mellom anna
- antal vedtak om heimetenester som vert sett i gong innan 15 dagar
- tal på personar som fullt ut får dekka opplevd behov for bistand til å delta i fritidsaktivitetar
- vi har ingen fastlegelister som manglar lege
- antal med fullført helseundersøking innan 1. skuleår
- netto utgift til førebygging pr innbyggar over 4 år
God sjukepleiardekning
Kommunebarometeret viser vidare at sektoren ligg på 18. plass med tanke på antal helsesjukepleiar-årsverk pr 10 000 innbyggar under fem år, 19. plass på antal av opphald på sjukeheim som er korttidsopphald og 20. plass når det gjeld rehabiliteringsplassar mot innbyggarar 67 år og oppover.
Vi ser oss veldig nøgde med årets gode plassering i pleie- og omsorg, og rapporten her viser at det gir resultat når ein arbeider målbevisst over tid. Slik vi har gjort når det gjeld tilsettingar av fagutdanna personell ved tilsetting og deretter satsing på etter- og vidareutdanning.