Boknatunopning, 1. oktober 1987: Fv. ordførar Leif Vatnaland og fylkesordførar Lars Vaage kuttar snora.
Stein Alendal
Av ordførar Osmund Våga
Han har vore ein av dei mest betydningsfulle politikarane i Bokn, med ein lang karriere i kommunestyret og som ordførar. Nokre av dei eg har snakka med, beskriv han som ein bauta i Bokn.
Leif blei først vald inn i kommunestyret i 1964, og var der nesten samanhengande til 2003, altså i 40 år. I desse åra var han også ordførar i fleire periodar, frå 1972 til 1995, til saman 15 år.
Han var også med i fylkestinget i 12 år, og satt der i kultur- og samferdselskomiteen. For dette arbeidet har han motteke KS si fortenestemedalje.
Omgjengeleg og inkluderande
Leif var kjend som ein omgjengeleg og inkluderande ordførar, med humor og eit glimt i auga. Han fekk folk til å føle seg vel i møter, og var meir opptatt av samarbeid og få ting til enn å framheve seg sjølv.
Han hadde eit stort engasjement for Bokn, for å utvikle kommunen vidare. Spesielt var han opptatt av samferdsel og kva betydning det ville ha med fastlandssamband. Leif var med i styret for Tungenes ferjeterminal, for å arbeide for Rennfast-prosjektet og ferje til Bokn.
Vore med på mykje
Leif har vore med på mykje av det viktige som har skjedd i kommunen.
Kongen har nettopp opna E39 Kyststamvegen og ferjedrift i Arsvågen, 26. juni 1991. Ordførar Leif Vatnaland til høgre og vegdirektør Eskild Jensen til venstre.
Stein Alendal
Han var ordførar under skulebygginga i 1973, bygging av nytt kommunehus (Boknatun) i 1987 og fastlandssamband med bruer og ferjekai i 1991. Spesielt arbeidde han mykje med planlegging og finansiering av Boknatun, der me fekk støtte frå staten til å bygga det.
Han inngjekk avtalen med Tysvær som har sørga for at Bokn har fått gode inntekter frå Kårstøanlegget i mange år, sjølv om det ikkje ligg i Bokn.
Og han sat i kommunestyret under arbeidet med bygging av den store gassrøyren Europipe 2 gjennom Bokn i 1999. Og bygging av ny barnehage i 2002.
Samfunnsengasjert bonde
I tillegg til å vere ein engasjert politikar med mange verv, var han også bonde. Han dreiv gard på Vatnaland saman med kona Liv. Der fekk dei også 4 barn, og det må ha vore travelt for Liv når han var oppteken i politikken.
Barna var som vanleg med i gardsdrifta, og etter at sonen Jens Morten overtok garden, var Leif og Liv med å hjelpte til. Leif fekk seg med tida ein gravemaskin, som han likte å arbeida med på garden.
Han var engasjert i samfunnet, og var med og starta musikkorpset og sat i styret der. Leif var også med i Senterpartiet, bondelaget, handelslaget og andre organisasjonar i kommunen.
Leif hadde stor sans for humor, og var med i revyen i Bokn. Då kultursoga til Bokn skulle skrivast, var han med i bygdeboknemda. Her gjorde han ein stor frivillig innsats og bidrog med mykje kunnskap om Bokn.
Leif har vore ein av dei mest betydningsfulle politikarane i Bokn si historie, og eg vil på vegne av Bokn kommune få takke han for hans innsats innan politikk og samfunnsliv.
Helsing
Osmund Våga
Ordførar