Det er Kvia Entreprenør som utfører arbeidet. Prosjektleiar for riveprosjektet, Bjørn Helge Laupland, fortel at dei i førre veke gjekk og plukka skulen rein innvendig. Mellom anna blei alt glas og vindauge tatt ut, og synleg el.-avfall.
Kjeldesortering
- Slik sparar me oss for ein del sortering med maskinane, seier Bjørn Helge Laupland.
Prosjektleiar for skulerivinga, Bjørn Helge Laupland.
Jardar Havikbotn
Dette prosjektet har nemleg krav om 60% sortering, og som sjølvsagt er tidkrevande. Å berre jamna bygget med jorda hadde gått fort.
Bjørn Helge Laupland seier dei mellom anna sorterer ut el.-avfall og tre - og ikkje minst betong, som er ein stor del av tyngden av avfallet. Betongen skal knusast for å få ut armeringa. Sorteringa skjer både med maskin (som ein kan sjå i videoen under Dagens bilde) og for hand.
Det er Franzefoss som køyrer bort avfallet.
Nostalgi
- Ting vil bli skikkeleg synlege når maskinane kjem inn til gymsalen og betongelementa, avsluttar Bjørn Helge Laupland.
Den gamle gymsalen og kulturstova.
Jardar Havikbotn
Og det var ekstra spesielt for underteikna å gå gjennom gymsalen i går, medan maskinane dura utanfor. Som musikklærar og kultursjef har eg hatt mykje å gjera med sjølve kulturstova i Bokn, før Bokn Arena kom i 2016.
Historikar Birger Lindanger synest det er vemodig.
- Ja, det er litt trist. Dette bygget har jo romma så mangt: skule, helsesenter, bibliotek, kommunestyresal, festlokale, for å nemna noko. I mange år som eit hjarta i Bokn, staden der me treftest. Vemodig, seier han.
Marie Vågshaug hadde siste skuleåret sitt her då skulen var flunkande ny i 1973.
- Eg har mange flotte minne frå det bygget, både frå kvardag og fest; 17. mai-feiringar, fiskarfest, bygdekveldar, kino, konsertar, bygderevy, bryllaup, partidebattar før val, basarar, osv. Ikkje minst har eg hatt ein god og triveleg arbeidsplass der også. Men det blir heldigvis ny 1. - 9. skule på Bokn, seier Marie Vågshaug.
Det passar å sitera tidlegare skulesjef, Jan Spurkeland, som i dag skriv:
"Minnerikt bygg som må vike for noko betre!"
Den nye skulen er planlagd innflyttingsklar i 2023.
Bilde frå den første rivingstimen: