Spesiell stemning
Dei fire siste novembermånadene har hatt forventningsfulle dagar med ei spesiell stemning, og det er svært hyggeleg for biblioteket og kulturkontoret at boknarane set pris på desse arrangementa, der det store delar av minifestivaldagen er ulike aktivitetar rundt dei to filmane som blir viste. I år fekk me også magisk stemning ute, da det begynte å snø utover kvelden!
Fv. biblioteksjef Thea Elisabeth Hansen, ordførar Egil Våge, administrativ leiar Nina Samdal og festivalsjef for Den norske filmfestivalen Tonje Hardersen og bibliotekvikar Regina Refvik og underteikna er strålande nøgde med årets mini-festival.
Jardar Havikbotn
1. – 4. klasse hadde animasjonsverkstad og Askepote-teikning om føremiddagen. Her blei det også lodda ut to gratisbillettar til kveldens barne/familiefilm, Askepote.
Pynta til fest
Mykje av grunnen til den spesielle stemninga er den faklande «filmstjerne-entréen» på raud løpar til eit fest- og julepynta bibliotek, med ei luktblanding av nypoppa popcorn, gløgg og peparkaker, akkompagnert av festivalplakatar og -effektar – for ikkje å gløyma litt julemusikk i bakgrunnen.
Festivalen er også ein bygdekinokveld og me har også god hjelp av 9. kl.-forelder/elev, som i tillegg til å ta seg av dei vanlege arbeidsoppgåvene sine på ein kinokveld, står for billett- og brussalet denne kvelden.
Gåvekort
Festivalsjef Tonje Hardersen og administrativ leiar Nina Samdal for Den norske filmfestivalen, saman med ordførar Egil Våge, var med og kasta glans over hendinga. Alle som var på kino fekk eit lodd då dei gjekk inn, og sistnemnde delte ut gåvekort på valfri kino det neste året.
Det var Karoline Mæland Mjølhus som vann gåvekort på den første filmen, og Janne Elisabeth Ytreland på den andre; Tre menn til Vilma.
Populær festival
Bokn er blant fem kommunar på Haugalandet som har inngått eit samarbeid med Den norske filmfestivalen. Dette er bakgrunnen for at me dei fire siste åra har hatt minifestivalar i kommunen.
Me gler oss allereie til neste år!
Fleire bilde frå festivalen. Vennligst ta kontakt med kulturkontoret, tlf. 98221508 dersom nokon ønsker bilde fjerna.