Det var Lene O. Foss frå Sparebanken Vest som kom med den hyggelege beskjeden på korpsøvinga 11. mai. Korpset hadde fått dispensasjon frå ein stengt Bokn Arena, til å få litt fri frå iskald nordavind og ha øvinga på golvet framfor scenen.
Som vanleg vil korpset vera ein viktig brikke på nasjonaldagen, også i årets spesielle feiring. Det er nok ikkje tilfeldig at denne utdelinga skjer i mai.
- Mai månad utan korpsmusikk er jo heilt utenkelig, seier banksjef ved Haugesund-kontoret til Sparebanken Vest, Nina Hopsdal.
Alle korpsa fekk
- For oss er det viktig å stilla opp for kulturlivet i regionen vår i denne krevande tida. Me ønsker å bidra til at frivillige lag og organisasjonar kan halda fram med det viktige arbeidet sitt også etter denne krisa, seier banksjefen.
Sparebankstiftelsen Sparebanken Vest oppretta koronafondet i mars i år som eit ekstraordinært tiltak, med formål om å støtta lag og foreningar på Vestlandet som slit økonomisk som følge av koronaepidemien. Fondet er på 100 millionar kroner, og totalt fekk over 150 korps 6,5 millionar av dei.