Snart er det jul igjen, og førjulstida er ofte prega av alt vi ikkje må gløyme: adventskalender, Luciafeiring i barnehagen, gåveinnkjøp og pynting.
– Vi vaksne bruker mykje tid og krefter på at jula skal bli like magisk som barna drøymer om. Det som er viktig å hugse på, er at det barn ønskjer seg aller mest, er trygge og gode vaksne som oppfører seg akkurat slik dei pleier, seier Ragnhild Kaski, generalsekretær i Av-og-til.
Ho peiker på at det ofte kan vere vanskeleg for vaksne å oppdage når det går frå å vere triveleg til å bli ubehageleg for barna. Det vaksne kan oppleve som positive endringar, som at ein ler meir eller snakkar litt høgare, kan gjere barn usikre og utrygge.
– For mange er alkohol ein viktig del av julekosen, og det er heilt greitt. Men vi må hugse at det er vårt ansvar at ikkje alkoholbruken til dei vaksne går ut over julekosen for barna, seier ho.
Bruk alkovett i jula
Bokn er ein Av-og-til-kommune og samarbeider tett med Av-og-til for å førebyggje og redusere skadeleg alkoholbruk.
– Alle barn fortener ei trygg og god julefeiring som kan gi dei hyggjelege minne å ta med seg vidare i livet. Derfor oppfordrar vi alle vaksne som skal feire saman med barn, om å tenkje over sin eigen alkoholbruk i jula, seier Av-og-til koordinator i Bokn kommune.
Ho oppfordrar alle i Bokn til å ta med seg nokre gode råd om barn og alkohol inn i juleplanlegginga.
Den viktigaste hugselista i jula:
- Drikk maks to glas når du er saman med barn
Tenk igjennom på førehand om du skal drikke, og i så fall kor mykje, når det er barn til stades. Når barn blir spurde, seier fleirtalet at dei ønskjer at vaksne skal drikke null eller berre eitt eller to glas alkohol når dei er saman med dei.
- Ver bevisst på kor mykje alkohol du kjøper inn
Jo meir alkohol vi kjøper, desto meir drikk vi gjerne òg. Pass på å fylle handlekorga med freistande alkoholfrie alternativ, så gjer du det lettare for folk å velje alkoholfritt. Kanskje du kan freiste med ein alkoholfri velkomstdrink eller setje saman ein alkoholfri drikkemeny som er tilpassa julematen?
- Bli einige med andre vaksne
Skal de feire jul saman med andre vaksne? Då kan det vere fint å avtale på førehand kva som er greitt og ikkje når det er barn til stades. Det kan vere lurt at minst éin er edru og kan køyre bil dersom det skulle skje noko.
- Hugs at barn merkar at du har drukke, tidlegare enn du trur
Ofte kan det vere vanskeleg for vaksne å oppdage når det går frå å vere triveleg til å bli ubehageleg for barna. Det vaksne kan oppleve som positive endringar, som at ein ler meir eller snakkar litt høgare, kan gjere barn usikre og utrygge.
Juleøl og akevitt er ein del av julekosen for mange. Pass på at det ikkje endar med at du neste dag må avlyse skituren, snømannbygginga eller andre juleaktivitetar som heile familien har gledd seg til.
- Ver spesielt bevisst i feriar og høgtider
For barna er jula er ei spesiell og magisk tid. Julaftan er ein dag dei har store forventingar til og gler seg til lenge i førevegen, og minna frå julefeiringa er noko dei tek med seg resten av livet. Det er vårt ansvar å sørgje for at alkoholbruken til dei vaksne ikkje går ut over barnas julehygge.
Vil du lese meir?
Besøk Av-og-til på nett: https://avogtil.no/tema/barn-og-unge/