Under overrekkinga av Kultursoga i Bokn Arena 3. januar orienterte forfattaren Kommunestyret om den store etterbruksverdien bøkene har, pga. alt materialet som er samla inn og digitalisert. Me snakkar om nærmare 25.000 dokument.
- Før arkivet i Bokn kommune fram til 1990 blei sendt til Interkommunalt arkiv i Stavanger, fotograferte eg av protokollane digitalt, seier historikaren.
Foto: Alt 9. april 1940 møttest styret i Sanitetsforeininga på Ungdomshuset for å skaffa utstyr og å planleggja hjelpearbeid sidan landet same dagen var kome i krig.
Nå tar han systematisk for seg av resten av protokollane, til då det blei vanleg å digitalisera slike papir kring tusenårskiftet. På denne måten blir samlinga av kommunestyre- og formannskapsprotokollane komplett, frå 1837 og fram til i dag - og klare for nettpublisering.
Stort spekter
Det er ikkje berre kommunearkivet som er tatt vare på. Entusiastisk ramsar historikaren opp døme som diplom frå Middelalderen, skatteopprør på 1500-talet, tingbøker frå 1616, kyrkjebøker, skattelister frå 1500-talet og utover, arveskifteprotokollar, pantebøker, festeprotokollar for husmenn, folgekontraktar frå 1600-talet og opp til i dag. Protokollar og lagsaviser frå ungdomslag, protokollar for kvinneforeningar av alle slag, og ikkje minst kopiar av det meste frå privatarkivet etter Elisæus Vatnaland, som i dag ligg på Statsarkivet.
Foto: Dokument datert 18. mars 1850, den fyrste formannskapsprotokollen s. 1 då formannsskapet var samla i Føresvik og valde Lars Loden til ordførar og Daniel Trosnavåg til varaordførar. Med det var Bokn oppretta som ein sjølvstendig kommune.
Pilotprosjekt
Interkommunalt Arkiv har utvikla ei programvare til å presentera dette på nettet. Dei ser på det heile som eit pilotprosjekt og Birger disponerer programmet. Han ser fram til å legga inn dokumenta i databasen, der alt blir søkbart. Verdien vil bli formidabel og Bokn vil få ein unik skatt.