Sjølv om årets 17. mai-komité legg opp til eit tradisjonelt program, blir det ei stor forandring når feiringa nå blir flytta frå Bokn skule til fleirbrukshallen.
Sitteplassgaranti og fleksibilitet
Den største fordelen er at det er god plass til alle i Bokns nye storstove. Så nå slepp folk å gå ut av toget for å sikra seg plass framfor scenen. Fleire aktivitetar kan også flyttast inn, og fleire lag slepp å bruka mange timar på å setta opp telt ute. Luftgeværskytinga til Skyttarlaget flyttar frå sløydsalen til lageret ved squashhallen.
Hallen i Bokn Arena blir møblert slik han blei på opningsdagen 1. oktober i fjor, med det nordlege feltet avsett til ulike aktivitetar og bord og stolar i midtfeltet og feltet framfor scenen. Ved ev. ruskevér kan mange leikar nå vera inne. Kanskje blir det gjensyn med nokre av aktivitetane frå den suksessrike opningsdagen, og kanskje blir nye tradisjonar skapte?
Frå Alvestadkroken til Bokn Arena
Komitéen vil gjenta fjorårets trivelege og maritime start frå sjøhuset til Lars Magnus Alvestad, med kapproing, frukost og togstart. Togruta til Boknatun blir lik som i fjor, men etter korpskonserten framfor sjukestova går toget vidare ned til fyrlykta i Føresvik og opp til Bokn Arena.
Oppfordringa til 17. mai er klar:
Slapp av og ta toget heile vegen til Bokn Arena med sitteplassgaranti!
Endeleg 17. mai-program kjem seinare.